Hunergeha Welat ji destana “Evîna Derwêş û Edûlê” re klîpek çêkir.

Hunergeha Welata ku yek ji saziyên hunerî yên sereke yên Rojavayê ye berhemeke nû pêşkêşî hezkiriyên hunera Kurdî kir.

Hunergehê destana navdar a “Evîna Derwêş û Edûlê” bi klîbek zindî kir û raxist pêş çavan. Klîp tenê çîroka evîna di navbera Derwêş û Edûlê de venabêje, di heman demê de çarçoveya dîrokî ya wê serdemê jî vedibêje.

Destan, qala şerê dîrokî yê eşîretên Mîlan û Beraziyan ê li hemberî Dewleta Osmaniyan û eşîretên Ereban dike û evîna her du lehengan di nava agirê şer de diçirise.

Ev berhema hunerî ya bi heybet, bi keda tîmeke profesyonel hatiye amadekirin.

Senaryo û derhêneriya klîpê ji aliyê Şêro Hindê ve hatiye kirin û muzîka wê jî mohra hunermendê navdar Mehmûd Berazî li ser e.

Dengbêj Delîl Mîrsaz bi dengê xwe can dide gotinên destanê.

Di klîpê de lîstikvan Barîn Hemo di rola Edûlê de û Şêrwan Mele jî di rola Derwêş de cih digirin.

Ev proje wekî gaveke girîng ji bo parastina mîrateya devkî ya Kurdan û gihandina wê ji nifşên nû re bi teknîkên hunerî yên modern tê dîtin.

Çavkanî: Rûdaw